Kunpuŝiĝo inter Reding kaj Cappato pri kultur-diverso, Ĉinujo kaj Esperanto (Cappato)

Cappato (Grup-senuloj). - Prezidanto, el via referaĵo ŝajnas, kvazaŭ la kultur-malamiko estus merkat-liberaligo kaj 'Tutmonda komerc-organizaĵo'; kaj, kvazaŭ la bastiono de kulturo aŭ de la kulturoj estus la naciaj Ŝtatoj. Tiel ne estas: forviŝojn de kulturoj kaj de popoloj realigis ĝuste naciaj Ŝtatoj kaj naciismaj ideologioj. Komisaro Reding, Ĉinujo efektivigis kaj efektivigas plejfiajn genocidojn de popoloj kaj de kulturoj: de la popolo kaj kulturo tibetaj, de la popolo kaj kulturo ujguraj. Neindas en jenan Eu-parlamentejon elmeti Ĉinujon kiel ekzemplon de fruktodona kultur-kunlaborado pri kultur-diverso, krom se oni alprenas, kiel sencon de la termino 'kulturo', tiun de la 'kultur-revolucio' Maŭ-epoka. Kultur-diverso ne estas, abstrakte, rajto; ĝi povas rezultati ankaŭ el reguloj, ja, sed el reguloj kiuj baziĝu sur komunikad- kaj esprim-libero, kaj ne sur protektismo (kultur-protektismo aŭ kultur-asistismo), nek sur kultur-relativismo de la naciaj Ŝtatoj. Reguloj necesas, ja, specife por kontraŭstari lingvo-detruadon; sed ĝuste la politiko de niaj naciaj Ŝtatoj instruigi nur unu fremdan lingvon, aŭ ĝuste la kondut-reguloj de la Eu-institucioj; ĝuste tiuj politiko kaj konduto kontraŭas la spiriton de diverso kiun la rezolucio alvokas: Eu-institucioj kun agentejoj unu- aŭ du-lingvaj, kiuj raportojn por la publiko eldonas eĉ ne en oficialaj Eŭrop-uniaj lingvoj. En nia voĉdon-deklaro, ni, radikalaj Eu-deputitoj, memorigos niajn proponojn pri: Observejo pri lingvo-politikoj; antaŭenigo de la internacia lingvo Esperanto; rajto je libera kaj internacia komunikado sendiskriminacia; gardo kaj firmigo de lingvo-diverso.